Reykti um borð þrátt fyrir bann

Björn Thoroddsen flugstjóri er síðasti maðurinn eða með þeim síðustu sem reyktu um borð í flugvélum Flugleiða. Hann telur að þeir hafi verið þrír til fjórir flugmennirnir sem komust upp með að reykja í flugstjórnarklefanum síðustu árin þó að reykingar væru bannaðar um borð. Björn reykir pípu. Hann hætti að fljúga fyrir þremur árum. "Flugleiðir ákváðu að verða reyklaust félag og ári síðar var það fest í lög. Þegar ákvörðun Flugleiða var kynnt FÍA var mér sagt að formaður félagsins á þeim tíma hefði bent á að það væru nokkrir flugstjórar sem væru ólæknandi nikótínistar og spurt hvað ætti að gera við þá? Sagan segir að stjórnendur fyrirtækisins hafi sagt að þeir yrðu látnir í friði. Við vorum þrír eða fjórir nefndir til sögunnar og það má segja að það hafi verið þegjandi samkomulag. Ég afsakaði mig alltaf á þessu," segir Björn Thoroddsen flugstjóri. Björn kveðst aldrei hafa heyrt neitt frá fyrirtækinu um reykingabann til flugmanna eða áhafna og ekki hafi komið nein sérstök fyrirmæli til flugstjóranna um að hætta að reykja í flugstjórnarklefanum. Aðstoðarflugmennirnir hafi sagt sér að reykingarnar færu ekkert í þá. "Það kvartaði enginn. Ég reyndi að púa fram í nefið á vélinni en það kom fyrir að reykurinn fannst í eldhúsinu aftast. Loftræstingin var þannig. Það kom fyrir að flugfreyjurnar héldu að einhver væri að reykja á klósettunum og rifu upp hurðirnar aftast en fundu ekki neinn." Nokkuð var um það síðustu árin að farþegar lokuðu sig inni á klósetti til að reykja. "Við fengum bréf um að við ættum að labba aftur í, skrifa niður sætisnúmerið og skoða vegabréfið, ræða við farþegann og biðja um að lögregla væri tilbúin til handtöku við lendingu. Síðan átti að stinga farþeganum inn og hann sektaður. Ég vissi dæmi þess að flugstjórar gerðu þetta. En svo voru stöðvarstjórarnir orðnir hundleiðir á því að láta lögregluna handtaka farþega." Björn tilkynnti aldrei reykingar farþega á klósettum og bætir við að sér finnist hræðilegt að fólk geti hvergi reykt um borð í flugvélum. "Það ætti að vera einhver staður í flugvélum fyrir þá sem reykja."