Íslendingar eiga tvö heimsmet

Íslendingar eiga tvö heimsmet í heimsmetabók Guinness og það þriðja er á leiðinni. Það mun víst vera staðreynd að engri bók er stolið í jafnmiklu mæli af bókasöfnum heimsins og bók dagsins. Og kannski við hæfi að bókin sjálf eigi það heimsmet, því hér er á ferðinni Heimsmetabók Guinness, sem í ár fagnar 50 ára afmæli sínu. Þetta er í fimmta sinn sem bókin kemur út á íslensku og það er óhætt að segja að útlit bókarinnar hefur tekið stórstígum breytingum í áranna rás. Árni Snævarr, blaðamaður, sem þýddi bókina, segir mismunandi útgáfur bókarinnar sína þá byltingu sem orðið hafi í prenttækni undanfarin tuttugu ár. Í áranna rás hefur metunum að sjálfsögðu fjölgað. Lesendur geta fræðst um hver eigi stærsta bananasafn heims, hver hafi leikið lengst á banjó og hvar stærstu nærbuxur heims sé að finna svo fátt eitt sé nefnt. Og svo við gerumst aðeins sjálfhverf; Ísland á tvö met í bókinni. Árni segir metin tvö vera elsta þingið og mestu aðsókn í bíó. Þá sé það þriðja á leiðinni, sem sé stærsta pylsa í heimi. Árni segir að sitt uppáhaldsheimsmet sé hraðasta flokkun sykurhlaupa með röri.