32 manna úrslit í Stjörnuleitinni í kvöld

32 manna úrslit í IDOL Stjörnuleitinni fara fram á Stöð 2 klukkan 20:40 í kvöld. Nú munu atkvæði sjónvarpsáhorfenda ráða úrslitum en dómnefndin verður samt áfram að störfum, þó aðeins til að gefa álit. Úrslitin verða alfarið í höndum landsmanna en símanúmer keppenda eru auglýst í þættinum. Niðurstaða símakosningar verður tilkynnt í beinni útsendingu á ellefta tímanum  í kvöld. Sett hefur verið upp sérstök heimasíða fyrir hvern keppanda á idol.is og þar má finna upplýsingar um SMS-númer og símanúmer viðkomandi fyrir símakosninguna í kvöld. Athygli hefur vakið að líkt og í fyrra mættu mun fleiri stúlkur en strákar í áheyrnarprófin en það er samt ljóst að karlpeningurinn á líka mjög góða fulltrúa í þessari keppni. Alltof snemmt er að spá fyrir um úrslit en það eina sem er víst er að veturinn verður mjög spennandi á Stöð 2 en ný Idol-stjarna verður krýnd í Vetrargarðinum í Smáralind 11. mars 2005. Anna Katrín Guðbrandsdóttir, Jón Sigurðsson og Kalli Bjarni komust í úrslitaþáttinn í fyrra þar sem sem sá síðastnefndi hrósaði eftirminnilegum sigri. Að þessu sinni verða aðeins tveir keppendur í lokaþættinum. Það eru Lísbet Hauksdóttir, Hildur Magnúsdóttir, Gísli Hvanndal Jakobsson, Svava Hrund Friðriksdóttir, Valgerður Friðriksdóttir, Hólmfríður Nordfjörð, Davíð Smári Harðarson og Brynja Valdimarsdóttir sem ríða á vaðið í fyrsta hluta 32 manna úrslita. Þau koma víða að en yngst eru Brynja og Gísli Hvanndal sem bæði eru 19 ára. Lísbet, Svava Hrund og Davíð Smári eru elst, 24 ára. Aðeins tveir halda áfram eftir hvern þátt en samt er ekki öll nótt úti enn fyrir hina. Dómnefndin tilnefnir átta söngvara í sérstakan þátt (Wild Card) í næsta mánuði. Þá verða valdir síðustu tveir keppendurnir í 10 manna úrslit. Ljóst er að marga dreymir um að slá í gegn en í áheyrnarprófunum í haust spreyttu allmargir sig öðru sinni. Margir höfðu bætt sig töluvert frá fyrra ári og einn keppandi er kominn í 32 manna úrslit öðru sinni. Þess skal jafnframt getið að á þessu stigi stjörnuleitarinnar fá söngvararnir að flytja lag að eigin vali. IDOL-vefurinn