50 störf tapast

Fimmtíu störf munu tapast um næstu mánaðamót í Mývatnssveit vegna lokunar Kísiliðjunnar, og allt að þrjátíu önnur eru talin í hættu. Formaður Verkalýðsfélags Húsavíkur lýsir eftir viðbrögðum stjórnvalda og segir furðu sæta að ekki skuli hafa verið brugðist við þessu nú þegar. Miklar umræður urðu um fyrirhugaða lokun Kísiliðjunnar í Mývatnssveit um næstu mánðamót á fundi Verkalýðsfélags Húsavíkur í gær. Atvinnuleysi blasir við starfsmönnum fyrirtækisins og segja félagsmenn lítið hafa borið á mótvægisaðgerðum til að takast á við þetta fyrirsjáanlega áfall. Hugsanleg bygging Kísilduftverksmiðju í sveitinni eftir nokkkur ár komi ekki í veg fyrir það. Aðalsteinn Baldursson, formaður Verkalýðsfélags Húsavíkur, segir það liggja fyrir að 50 manns missi vinnuna og þó nokkuð af störfum séu auk þess í hættu. Þetta sé eitt mesta atvinnulífsáfall á svæðinu og jafnvel landinu öllu á undanförnum árum. Það sé slæmt að ekkert heyrist í stjórnvöldum vegna málsins. Lítið hafi heyrst í stjórnvöldum, síðan haldinn var fundur með þeim vegna málsins fyrir töluverðu síðan.