Mörg lið á eftir Mutu

Gheorghe Popescu, umboðsmaður hins umdeilda framherja Adrian Mutu, segir að umbjóðandi sinn muni skrifa undir samning við "stórt vestur-evrópskt" lið innan tveggja vikna. Mutu féll sem kunnugt er á lyfjaprófi í haust og var settur í sjö mánaða bann af enska knattspyrnusambandinu auk þess að Chelsea sagði upp samningi sínum við hann. "Við höfum verið í viðræðum við nokkur evrópsk lið" sagði Popescu við fréttastofu Reuters. "Það besta fyrir Mutu er að skrifa undir samning við nýtt lið svo fljótt sem unnt er. Innan tveggja til þriggja vikna mun hann skrifa undir samning við nýtt félag", bætti Popescu við og sagði að umrætt félag yrði vestur-evrópskt og af sterkari kantinum. Mutu bað stuðningsmenn Chelsea formlega afsökunar á mistökum sínum í þættinum Football Focus á BBC í morgun. "Ég sé mjög eftir því sem ég gerði. Ég veit að ég hef valdið þeim vonbrigðum (stuðningsmönnum Chelsea). Ég óska þeim alls hins besta og ég óska þess að sjá Chelsea standa sig vel í framtíðinni", sagði Mutu.