Skorar Owen í Kænugarði?

Michael Owen verður undir smásjánni í kvöld er Real Madrid mætir Dynamo Kiev í Kænugarði. Eftir dapra byrjun með Real hefur Owen skorað í fjórum leikjum í röð og allir munu fylgjast með því hvort hann skori í fimmta leiknum í röð. Real þarf þar að auki nauðsynlega á sigri að halda í leiknum enda eru þeir jafnir Kiev og Leverkusen að stigum. "Það er erfitt að koma hingað og sækja stig en spilar Dynamo með miklu sjálfstrausti á heimavelli," sagði Garcia Remon, þjálfari Real Madrid. "Við munum aftur á móti leika til sigurs enda teljum við okkur hafa lið sem getur sigrað hér í Kænugarði." Manchester United tekur á móti Spörtu frá Prag á Old Trafford og þarf að klára þann leik. Ruud Van Nistelrooy kemur inn í lið United á nýjan leik og mun leika frammi með Wayne Rooney sem skoraði þrennu í sínum fyrsta leik með United í Meistaradeildinni. Nistelrooy er á heimavelli í Meistaradeildinni enda hefur hann skorað 31 mark í 35 leikjum í þessari sterkustu deild í heimi. "Ég hef miklar væntingar til Nistelrooys í leiknum," sagði Sir Alex Ferguson, stjóri Man. Utd. "Ég vona að hann fái flest færin því þá eru ansi miklar líkur á að við skorum." Roy Keane kemur væntanlega inn í lið United á ný eftir meiðsli og hann segir að ekkert nema sigur komi til greina. Liverpool á erfitt verkefni fyrir höndum á Riazor-vellinum þar sem Deportivo la Coruna tekur á móti þeim. Eftir jafntefli gegn Deportivo á heimavelli þarf Liverpool nauðsynlega á sigri að halda á Spáni. "Þeir verða mjög grimmir og við verðum að verjast vel ef við ætlum að ná stigi," sagði Rafael Benitez, stjóri Liverpool, en hann mun væntanlega tefla fram hinum unga Florent Sinama-Pongolle í stað Djibril Cisse sem er fótbrotinn.