Ástæða til að endurskoða reglurnar

Fyllsta ástæða er að skoða reglur Kópavogsbæjar um úthlutun á byggingarétti í framhaldi af því að Byggingarfélaginu Viðari ehf. var úthlutað lóð og fyrirtækið síðan selt hæstbjóðanda skömmu seinna. Þetta segir Hafsteinn Karlsson, bæjarfulltrúi Samfylkingarinnar. Greint var frá málinu í Fréttablaðinu í gær og var það rætt á fundi bæjarráðs í gær. "Við viljum ekki að það sé eitthvað lóðabrask í gangi með þær lóðir sem við erum að úthluta," segir Hafsteinn. "Það er alveg augljóst að það var reyndin í þessu tilfelli og við því verðum við að bregðast." Samkvæmt heimildum blaðsins er óánægja innan bæjarkerfisins með úthlutunarferlið í þessu máli. Heimildirnar herma að bæjarstjórn hafi ákveðið að koma eiganda byggingarfélagsins til aðstoðar. Hann hefði byggt í Kópavogi um árabil en síðan orðið gjaldþrota. Með tilliti til þessa hefði hinu nýja fyrirtæki hans verið úthlutað lóðinni. Það mun síðan hafa komið flatt upp á suma bæjarfulltrúa þegar fréttist að byggingarfélagið hefði verið selt hæstbjóðanda skömmu eftir að það fékk lóðinni úthlutað og eigandinn hagnast um tugi milljóna á sölunni. Kópavogsbær úthlutaði í gær átta fjölbýlishúsalóðum. Alls sóttu 113 byggingarfyrirtæki um lóðirnar.