Stóriðja rúmast ekki innan Kyoto

Áætlanir um að reisa álver á Norðurlandi standast ekki ef tekið er tillit til skuldbindinga Íslands í Kyoto-sáttmálanum um takmörk við losun gróðurhúsalofttegunda. Rússar hafa staðfest samninginn og þar með verður hann bindandi frá árinu 2008 til 2013. Árni Finnsson, formaður Náttúruverndarsamtaka Íslands, segir að nýtt álver verði aldrei minna en 300.000 tonn og því megi gera ráð fyrir að gróðurhúsalofttegundir frá því rúmist ekki innan skuldbindinga. "Svo spyr maður sig hvaðan þeir ætla að fá orkuna. Almenningi er sagt að það eigi að vernda Jökulsá á Fjöllum og Dettifoss en það er eina vatnsfallið sem myndi duga fyrir stóriðju. Það er ósennilegt að þeir ætli að virkja ár um allar koppagrundir á Norðurlandi því það yrði of kostnaðarsamt." Árni segir að Náttúruverndarsamtökin hafi skrifað Valgerði Sverrisdóttur iðnaðarráðherra í lok ágúst og spurt hvort Framsóknarflokkurinn stæði við kosningaloforð flokksins um að það yrði myndaður þjóðgarður sem tæki til Jökulsár á Fjöllum. Hún hafi ekki svarað.