Vill breiðari veg og minni hraða

Fjöldi umferðaróhappa hefur orðið á gatnamótum við Suðurlandsveg í nágrenni Reykjavíkur. Bragi Sigurjónsson, bifvélavirkjameistari í Geirlandi við Suðurlandsveg, segist langþreyttur á ástandinu en hann hefur ítrekað kallað eftir úrbætum hjá Vegagerðinni. Hann hefur stungið upp á að vegurinn yrði breikkaður þar sem gatnamót eru. "Þannig ættu bílar auðveldara með að komast inn á veginn og ökumenn auðveldara með að skjóta sér fram hjá bílum sem bíða færis að aka út af veginum," segir hann og vill jafnframt láta lækka leyfilegan hámarkshraða niður í 80 kílómetra á klukkustund. "Setja ætti niður hraðann strax fyrir ofan Lögbergsbrekku. Oft er rosaleg sigling á mönnum niður hana á leið í bæinn," segir hann. Jón Rögnvaldsson vegamálastjóri segir heilmikil vandræði af því hvað smátengingar séu margar inn á Suðurlandsveginn Reykjavíkurmegin. "Mjög nauðsynlegt er að fara að vinna í að fækka þeim, loka einhverjum og sameina, en það verður náttúrlega ekki gert nema í samvinnu við viðkomandi sveitarfélög." Jón bætir við að mikill áhugi sé innan Vegagerðarinnar á úrbætum á svæðinu og gerir ráð fyrir að sá áhugi sé einnig fyrir hendi í hjá sveitarfélögunum.