Ökuriti fækkar óhöppum

Bílslysum hefur fækkað um fimmtíu prósent hjá þeim fyrirtækjum sem hafa sérstakan ökurita í bíl sínum, sem skráir niður allar upplýsingar um á hvaða hraða menn keyra og eftir hvaða götum á hverjum tíma. Meðal þess sem ökuritinn gefur upplýsingar um er hraði, hversu hratt menn keyra í beygjur, inngjafir og hemlanir. Tækið gefur svo rafræna skýrslu, þar sem fram kemur hvar og hvenær þetta slæma aksturslag átti sér stað.Tækið er alíslensk uppfinning fyrirtækisins New Development, og einkaleyfisvernduð. Íslandspóstur hefur notað það í bíla sína síðustu rúm þrjú ár, einnig notar Strætó tækið, Securitas og fleiri fyrirtæki. Sigurður Helgason hjá Umferðarráði segir að óhöppum hafi fækkað um allt að 50% hjá þeim fyrirtækjum sem noti ökuritann og það sé eitthvað sem munar um þegar tekið er til iðgjalda og bílatrygginga. Hann segir tækið jafnframt geta nýst foreldrum barna sem séu nýbúin að fá bílpróf, vilji þau reyna að hafa góð áhrif á aksturslag þeirra.