Enn ekkert að gerast

Enn situr allt fast í kennaradeilunni, og staðan sú sama og fyrir helgi. Ríkissáttasemjari hefur ekki miðlunartillögu í undirbúningi enn sem komið er. Formlegur sáttafundur sem átti að hefjast klukkan fimm í dag, var enn ekki hafinn skömmu fyrir fréttir. Ríkissáttasemjari hitti fulltrúa kennara og sveitarfélaganna á tæplega tveggja tíma fundi síðdegis í dag, en harla lítið virðist hafa komið út úr því. Finnbogi Sigurðsson, formaður félags grunnskólakennara segir ekkert nýtt að frétta og staðan sé óbreytt. Hann segir enga lausn í sjónmáli.Birgir Björn Sigurjónsson, formaður samninganefndar sveitafélaganna segist vonast til þess að eitthvað gerist, en hann hafi ekki enn séð neitt sem bendi til þess. Hann segir ríkissáttasemjara ekki hafa lagt fram neina nýja málamiðlunartillögu. Bæjarstjóri Akureyrar, kom með hugmynd um lausn á kennaradeilunni í dag sem felur í sér 300 þúsund króna meðalgrunnlaun gegn því að vinnutími yrði einfaldaður. Þessi tillaga var ekki rædd í Karphúsinu í dag.