Ráðherra svarar verkfræðinemum

Þorgerður Katrín Gunnarsdóttir menntamálaráðherra þekktist í gær boð verkfræðinema við Háskóla Íslands um að heimsækja þá og kynna sér skólastarfið. Nemarnir skoruðu á ráðherra að mæta í opnu bréfi sem þeir rituðu síðasta föstudag. Jafnframt óskuðu þeir eftir rökstuðningi á ummælum hennar í fjölmiðlum um "meðalmennsku í verkfræðinámi". Þá vildu nemarnir vita hvar verkfræðideild Háskólans væri í framtíðaráætlunum ráðherrans, þær hafi ekki borið á góma á ráðstefnu um menntun verk- og tæknifræðinga í september, þó að ítarlega hafi verið rætt um sameiningu Háskólans í Reykjavík og Tækniháskólans. "Ég er nokkuð sáttur við svör ráðherra," sagði Andri H. Kristinsson, formaður VIR, félags rafmagns- og tölvuverkfræðinema. "Hún staðfesti hvað við værum öflug og ítrekaði að henni þætti mjög góður staðall á náminu hér," sagði hann en taldi að nokkuð hefði skort á skýr svör varðandi framtíðaráætlanir vegna verkfræðideildarinnar. "Fram kom að grænt ljós væri komið í bæði menntamála- og fjármálaráðuneytinu á nánari athugun á vísindagörðum í Vatnsmýri."