Kaldaljós með 8 tilnefningar

Kvikmyndin Kaldaljós hlýtur átta tilnefningar til Eddunnar, íslensku kvikmyndaverðlaunanna. Karlar og konur eru nú í fyrsta sinn tilnefnd saman til leikaraverðlauna. Páll Steingrímsson fær heiðursverðlaun Eddunnar í ár, fyrstur íslenskra kvikmyndagerðarmanna. Tveir leikarar úr Kaldaljósi eru tilnefndir til verðlauna fyrir leik í aðalhlutverki; feðgarnir Áslákur Ingvarsson og Ingvar E. Sigurðsson. Þá eru þrír leikarar úr Kaldaljósi tilnefndir fyrir leik í aukahlutverki; Helga Braga Jónsdóttir, Kristbjörg Kjeld og Snæfríður Ingvarsdóttir. Myndin er ennfremur tilnefnd fyrir hljóð og myndvinnslu og Hilmar Oddsson er tilnefndur sem besti leikstjórinn. Loks er myndin tilnefnd sem besta kvikmynd ársins, ásamt Dís og Næslandi, en Kaldaljós hefur þegar verið tilnefnd sem framlag Íslands til Óskarsverðlaunanna. Eddu verðlaunin verða afhent þann 14. nóvember. Þá verður Páll Steingrímsson, kvikmyndagerðarmaður heiðraður sérstaklega fyrir langan á feril á sviði heimildarmyndagerðar, og er hann fyrsti kvikmyndagerðarmaðurinn sem hlýtur heiðursverðlaun Íslensku kvikmynda og sjónvarpsakademíunnar. Páll segist hafa verið afar heppinn á sínum lífsferli. Hann segist kannski fyrsti Íslendingurinn sem hafi lifað af heimildarmyndagerð. Hann viti ekki um aðra sem hafi haft fólk jafn lengi í vinnu og hann. Hann segist nú vera að uppskera fyrir vinnu sína, sem hann segist fá afar mikla ánægju úr og hann beinlínis vakni með bros á vör.