Þremenningarnir á leiðinni heim

Íslensku friðargæsluliðarnir sem særðust í sjálfsvígssprengjuárás í Kabúl í Afganistan á laugardag koma heim í sjúkraleyfi á föstudag. Tveir þeirra, Sverrir Haukur Grönli og Steinar Örn Magnússon, fara aftur til Kabúl eftir viku til tíu daga en óvíst er hvort Stefán Gunnarsson fari aftur út. Hann slasaðist mest af Íslendingunum í árásinni, fékk sprengjubrot í fót og neðri hluta líkamans. Afgönsk stúlka og bandarísk kona létust í árásinni. Stefán liggur enn á spítala í Kabúl en Sverrir og Steinar eru komnir á flugvöllinn sem er undir stjórn íslenska friðargæsluliðsins. Búist er við Stefáni þangað í síðasta lagi á miðvikudag. Hallgrímur Sigurðsson, yfirmaður flugvallarins, segir að Stefán sé við góða heilsu. Hann segir að mönnum sé brugðið og málin hafi verið rædd af mikilli alvöru í þeirra hópi í gær. Reglur hafi ekki verið brotnar með því að ferðast inn í borgina og engar breytingar verði gerðar á starfseminni. Hins vegar kunni að verða breytingar á reglum um ferðir inn í Kabúl. Þýskur hershöfðingi, sem er hæstráðandi setuliðsins í Afganistan, sagði við Hallgrím í gær að hugsanlega verði hermönnum og friðargæsluliðum bannað að ferðast um borgarhlutann þar sem árásin var gerð. Talíbanar hafa lýst sprengjuárásinni á hendur sér og fullyrða að hún sé upphafið að frekari árásum á vestræna hermenn og friðargæsluliða. Hallgrímur segir að vígamenn í landinu geri lítinn greinarmun á friðargæsluliðum og hermönnum. Þrír friðargæsluliðar hafa verið myrtir í Afganistan á þessu ári. Í maí féll Norðmaður þegar skotið var úr sprengjuvörpum á hóp friðargæsluliða og tveir féllu í sjálfsvígssprengjuárásum í janúar. Það hefur enginn í íslenska friðargæsluliðinu óskað eftir því að hætta störfum í Kabúl eftir árásina að sögn Hallgríms. Dvöl hópsins fer senn að ljúka því að nýr sextán manna hópur tekur við stjórn flugvallarins í desember. Utanríkisráðuneytið neitar að veita upplýsingar um hverjir skipa hópinn.