Fundur boðaður á morgun

Forsætisráðherra hvetur deilendur í kennaradeilunni til að setjast að samningaborðinu aftur og ítrekar að lög verði ekki sett á verkfallið. Launanefnd sveitarfélaganna segir gerðadóm í málinu ekki koma til greina, en að tilboð sem sáttasemjari lagði fram, standi enn. Ríkissáttasemjari var boðaður með stuttum fyrirvara á fund forsætisráðherra nú í hádeginu. Fulltrúar kennara og launanefndar sveitarfélaganna gengu á fund forsætisráðherra, fjármálaráðherra og menntamálaráðherra í morgun, en forsætisráðherra hafði boðað þá á sinn fund. Að sögn Eiríks Jónssonar formanns Kennarasambands Íslands var farið yfir stöðu mála á fundinu og hver staðan hafi verið þegar uppúr slitnaði síðasta fimmtudag. Hann segir ráðherra ekki hafa verið með nein útspil á fundinum. Farið hafi verið fram á að menn settust aftur að samningaborðinu, enda væri hálfsmánaðar hlé ekki ásættanlegt á þessum tímapunkti og segist Eiríkur sammála því og hans menn muni mæta á fundi um leið og eftir því verði leitað, en varar um leið við því að menn sitji langdvölum í Karphúsinu, öðruvísi en að vera með eitthvað sem gæti orðið grunnur að samkomulagi. Eiríkur segir gerðardóm ekki hafa verið ræddan nema mjög óformlega í fundarlok og þá ekki sem raunhæfan möguleika. Hann segir forsætisráðherra ekki hafa boðað lög á verkfallið og engin vinna í þá veru hefði farið fram í ráðuneyti hans. Að loknum fundinum með kennurum gengu fulltrúar launanefndar sveitarfélaganna á fund ráðherra. Eftir fundinn sögðu þeir gerðardóm ekki koma til greina í málinu, en ítrekuðu að tilboðið sem ríkissáttasemjari lagði fram í síðustu viku stæði enn og nota mætti það sem grundvöll frekari viðræðna, en meira fjármagn yrði ekki sett í málið. Þá gekk Ásmundur Stefánsson ríkissáttasemjari á fund ráðherra nú laust fyrir klukkan tólf og í hádegisfréttum Ríkisútvarpsins var sagt að boðað hefði verið til fundar á nýjan leik á morgun