Búið að útskrifa tvo hinna slösuðu

Tveir af þeim þremur Íslendingum sem slösuðust í sprengjuárásinni í Kabúl á laugardag, voru útskrifaðir af sjúkrahúsi í morgun. Þeir hafa allir óskað eftir því að yfirgefa Afganistan og koma til Íslands næsta föstudag. Hallgrímur Sigurðsson, yfirmaður flugvallarins í Kabúl, sagði í viðtali við fréttastofu, nú skömmu fyrir fréttir, að Steinar Örn Magnússon, og Sverrir Haukur Grönli, sem eru í Íslensku friðargæslunni í Afganistan, hefðu verið útskrifaðir af sjúkrahúsi í Kabúl í morgun, en þeir særðust í sjálfsmorðsárásinni sem gerð var í miðborg Kabúl á laugardag. Félagi þeirra, Stefán Gunnarsson, særðist einnig, en hann liggur enn á sjúkrahúsi, þar sem hann fékk meðal annars sprengjubrot í fótinn og á neðri hluta líkamans. Íslensk stjórnvöld hafa fordæmt harðlega sprengjuárásina og yfirlýsingu Talíbana í kjölfar hennar, en Halldór Ásgrímsson forsætisráðherra segir að atburðirnir hafi þó engin áhrif á starf Íslensku friðargæslunnar þar. Hallgrímur Sigurðsson segir líðan þremenningana ágæta, þrátt fyrir þessa skelfilegu árás. Hann segir tvo þeirra komna af spítalanum og sá þriðji verði væntanlega útskrifaður á morgun. Að eigin ósk fari þeir heim á fimmtudaginn, fyrst og fremst vegna fjölskylduaðstæðna. Ekki sé ákveðið hvort eða hvenær þeir fari aftur til Kabúl. Hallgrímur segir að menn muni halda sínu striki áfram þrátt fyrir árásina og væntenlega verði ekki sendir aðrir menn í stað þeirra sem í árásinni lentu.