Óska eftir áliti Umboðsmanns barna

Fræðsluráð Reykjavíkur hefur óskað eftir áliti Umboðsmanns barna á rétti barna til náms í verkfalli og hver eigi að verja rétt þeirra þegar hagsmunir tveggja hópa rekast á, eins og í verkfalli grunnskólakennara. Áheyrnarfulltrúi foreldra lagði fram fyrirspurn um réttindi barna á fundi fræðsluráðs sjötta þessa mánaðar. Þar er spurt hver beri ábyrgð á því að grunnskólabörn í Reykjavík hafa ekki getað sótt skóla vegna verkfalls kennara. Og einnig að Íslandi sé skólaskylda og réttur barna til menntunar skilgreindur í lögum, þar sem einnig sé skilgreindur réttur launþega til að berjast fyrir hagsmunum sínum. Áheyrnarfulltrúi foreldra spurði því fræðsluráð hver eigi að verja hagsmuni barnanna þegar upp kemur sú staða að hagsmunir tveggja hópa rekist á, eins og nú í verkfallinu. Fræðsluráð ákvað að óska eftir áliti Umboðsmanns barna á málinu. Þórhildur Líndal umboðsmaður barna er fjarverandi og ekki væntanleg til starfa aftur fyrr en 1. nóvember, þannig að álit umboðsmanns á því hver eigi að gæta réttar barnanna í verkfallinu,liggur ekki fyrir fyrr en eftir það.