Íslendingar áfram í Afganistan

Halldór Ásgrímsson forsætisráðherra segir að íslenska friðargæslan muni starfa áfram í Kabúl þrátt fyrir sjálfsmorðsárásina í gær þar sem þrír Íslendingar særðust. Farið verði yfir öryggisráðstafanir ásamt samstarfsþjóðunum. Forsætisráðherra segir atburðinn í gær hörmulegan. Íslendingar muni samt áfram starfa í Afganistan eins og þeir hafi skuldbundið sig til að gera. Spurður hvort íslensku friðargæslumennirnir séu hermenn, líkt og Reuters hélt fram í fréttaskeyti í morgun, segir Halldór að þeir séu vopnaðir og hafi því möguleika til sjálfsvarnar, en þeir séu ekki hermenn. Þeir lúti aga og beri titla en forsætisráðherra vill ekki kalla það „heraga“ eða líkja titlunum við þá sem tíðkast innan herja. „Við erum ekki með her en að sjálfsögðu þarf að skipuleggja mál með öðrum hætti en til dæmis hér á landi þegar svona ástand er,“ segir Halldór. Forsætisráðherra segir fulla ástæðu til að auka öryggi Íslendinganna meira en verið hefur til þessa. Hann segir að farið verði yfir þau mál ásamt samstarfsþjóðum Íslands í Afganistan. Hægt er að hlusta á viðtal við forsætisráðherra úr hádegisfréttum Bylgjunnar með því að smella á hlekkinn hér að neðan.