Særðir eftir sprengjuárás

Tveir Íslendingar liggja á sjúkrahúsi eftir sprengjuárás í miðborg Kabúl í gær. "Við teljum að maður hafi hent til okkar fjórum handsprengjum og þar af hafi þrjár sprungið. Þetta gerðist samt allt mjög hratt og erfitt að segja nákvæmlega til um hvað gerðist. Ein tilgátan er sú að maðurinn hafi verið með sprengjurnar á sér," segir Hallgrímur Sigurðsson, starfsmaður íslensku friðargæslunnar og yfirmaður flugvallarins í Kabúl. Þrír Íslendinganna slösuðust en enginn þeirra alvarlega. Sverrir Haukur Grönli fékk minniháttar skrámur en þeir Stefán Gunnarsson og Steinar Örn Magnússon fengu sprengjubrot í útlimi og eru á þýsku hersjúkrahúsi í úthverfi Kabúl. Að sögn Hallgríms er líðan Stefáns og Steinars ágæt. "Þeim líður bara vel. Það er samt ómögulegt að segja til um hvenær þeir geta hafið störf á ný." Aðspurður segir hann að komið hafi til tals að senda mennina heim. "Þeir eru bara á spítala og málið verður skoðað betur þegar tækifæri gefst." Aðspurður um tíðni árása í nánasta umhverfi friðargæsluliðsins segir Hallgrímur alltaf eitthvað um árásir sem beinast gegn friðargæsluliðinu í Kabúl. "Það hefur verið frekar lítið um svona árásir undanfarið. Síðasta sjálfsmorðsárásin sem ég man eftir var í byrjun ársins. Þetta er ákveðið áfall og mönnum er brugðið," segir Hallgrímur. "Við erum hins vegar allir undir það búnir að eitthvað slíkt geti gerst. Allir sem eru hér vita að við getum lent í árás, hvort sem er á flugvellinum eða á ferð okkar um Kabúl." Hallgrímur segist sannfærður um að árásinni hafi ekki verið beint gegn Íslendingum sjálfum heldur hafi hún verið gerð til að koma höggi á friðargæsluliðið. "Ákveðnar líkur er hægt að leiða að því að árásinni hafi verið beint gegn friðargæsluliði NATO."