Eldur í fjölbýlishúsi í Kópavogi

Allt tiltækt lið slökkviliðsins var kallað út laust fyrir klukkan 10 í morgun vegna elds í fjölbýlishúsi við Þverbrekku 4 í Kópavogi. Minni hætta reyndist þó á ferðum en virtist í fyrstu, því reyk lagði upp úr þaki hússins. Guðmundur Halldórsson, stöðvarstjóri hjá Slökkviliði Höfuðborgarsvæðisins, segir menn hafa óttast að kviknað væri í efstu hæðinni, en eldurinn reyndist hins vegar eiga upptök sín í ruslageymslu í kjallara. Reykinn lagði hins vegar upp um loftræstirör og út um túður á þakinu. Slökkvistarfið gekk vel og var byrjað að reykræsta húsið upp úr klukkan 10.