Nýtt rannsóknar- og nýsköpunarhús

Nýtt rannsóknar- og nýsköpunarhús var tekið í notkun á Akureyri í gær. Húsið er 5.500 fermetrar að stærð og á sjö hæðum. Margar stofnanir koma til með að hafa aðstöðu í húsinu. Þar á meðal Atvinnuþróunarfélag Eyjafjarðar, Hafrannsóknastofnunin, Veðurstofa Íslands og Rannsóknarstofnun og aðalskrifstofa Háskólans á Akureyri. Íslenskir aðalverktakar byggðu húsið en Landsafl er eignaraðili þess. ISS mun reka húsið fyrir leigjendur þess næsta aldarfjórðunginn. Fyrsta skóflustunga að húsinu var tekin fyrir um einu og hálfu ári.