Sex milljarða tekjur árið 2007

Óraunhæft er að spá stýrihóps um aukið verðmæti sjávarfangs nái fram að ganga Samkvæmt spánni var gert ráð fyrir að útflutningsverðmæti fiskeldis yrðu komin upp í 36 milljarða króna árið 2012. Í fyrra nam útflutningsverðmætið 1,5 milljarði króna. Í skýrslu Valdimars Inga Gunnarssonar um stöðu og framtíðaráform í íslensku fiskeldi kemur fram að þessi spá, sem kemur fram í skýrslu stýrihópsins sem gefin var út í október árið 2002, sé ekki raunhæf. Ekki liggi fyrir áætlanir um stórfellda uppbyggingu í fiskeldi hér á landi. "Til að það náist [36 milljarða króna útflutningsverðmæti] , þarf að framleiða 150 þúsund tonn af verðminni tegundum eins og laxi og þorski," segir í skýrslu Valdimars Inga. "Heimilt er að framleiða rúmlega 20 þúsund tonn af eldislaxi og er líklegt að framleiðslan fari ekki yfir það vegna andstöðu við við laxeldi, óhagstæðs markaðsverð og harðrar samkeppni." Valdimar Ingi telur hugsanlegt að markmið stýrihópsins um að útflutningsverðmæti fiskeldis verði sex milljarðar árið 2007 náist. Árni M. Mathiesen sjávarútvegsráðherra segir að skýrsla stýrihópsins hafi fyrst og fremst verið sett fram til að sýna hverjir möguleikarnir væru ef allt gengi að óskum. "Þetta var ekki einhver áætlun eða markmið," segir Árni. "Aðalatriðið er að við stöndum skynsamlega að uppbyggingu fiskeldis." Aðspurður segist Árni ekki óttast að uppbygging fiskeldis nú fari eins og fiskeldisævintýrið á níunda áratugnum þegar fjöldi fyrirtækja varð gjaldþrota. Hann segir að þróunin í fiskeldi hérlendis sé hæg og það sé ekki endilega neikvætt. Hluti af skýringunni sé að opinberir sjóðir séu ekki að fjármagna fiskeldið heldur standi fyrirtækin straum af öllum kostnaði sjálf. Árni segir að ýmsir utanaðkomandi þættir hafi staðið fiskeldinu fyrir þrifum. Gengisþróun hafi verið neikvæð sem þýði að afurðaverð hafi verið fremur lágt. Eins hafi verðlækkanir á mörkuðum, sérstaklega lægra verð á laxi, haft áhrif. "Þetta sýnir okkur líka að ef verðþróun á erlendum mörkuðum og gengisþróunin verður hagstæð þá geta hlutirnir gerst ansi hratt," segir Árni.