Lán upp á 13,2 milljarða uppgreidd

Landsmenn hafa greitt upp lán hjá Íbúðalánasjóði fyrir 13,2 milljarða síðan bankarnir kynntu ný húsnæðislán sín. Þetta samsvarar þriggja mánaða útlánum sjóðsins. Þetta kemur fram í svari félagsmálaráðherra við fyrirspurn Jóhönnu Sigurðardóttur, þingmanns Samfylkingarinnar. Greining Íslandsbanka segir að ætla megi að stór hluti þessara uppgreiðslna sé endurfjármagnaður með íbúðalánum hjá bönkunum, sem bjóða betri vexti. Útlán bankanna til heimilanna hafa aukist um 13,6 milljarða króna í september samkvæmt tölum sem Seðlabanki birti í gær og segir Íslandsbanki að það sé að mestu leyti vegna aukinna íbúðalána. Á sama tíma og bankarnir lánuðu 13,6 milljarða lánaði Íbúðalánajsóður 4,6 milljarða sem er um milljarði minna en á sama tíma í fyrra. Landsmenn hafa því greitt upp lán sín hjá Íbúðalánasjóði, síðan bankarnir komu til skjalanna, upphæð sem svarar þriggja mánaða útlánum sjóðins. En hvaða áhrif hefur þetta á starfsemi sjóðsins? Fjármálaráðherra segir í svari sínu til Jóhönnu Sigurðardóttur að áhrifi samkeppninnar á Íbúðalánasjóð séu enn óljós en þegar fram líði stundir væri hægt að gera greiningu á þróuninni, þ.e. þegar betri upplýsingar frá bönkunum, Fasteignamatinu og Seðlabankanum bærust. Það sé hins vegar víst að ótakmörkuð lánsfjárhæð bankanna muni áfram veita þeim forskot á Íbúðalánasjóð, þrátt fyrir að hámarkslán Íbúðalánasjóðs hafi verið hækkuð í 11,5 milljónir og lánshlutfall verði hækkað í 90%.