Skemmdir í kirkjugarði í Keflavík

Skemmdir voru unnar í kirkjugarðinum við Aðalgötu í Keflavík í gær. Fimm krossar voru losaðir upp og 21 legsteini var velt við. Einn legsteinn var brotinn sem og nokkur luktarhús, blómaker og styttur. Elías Guðmundsson umsjónarmaður Kirkjugarða Keflavíkur segir skemmdirnar hafa komið í ljós um morguninn þegar aðstandendur komu til að vitja leiðis látins ættingja. Eignartjónið sé mikið: "Dýr minningarmörk voru skemmd. Sum gjörsamlega eyðilögð." Elías segir skemmdarverk hafa áður verið unnin í garðinum, enda sé hann öllum opinn og í miðjum bænum, en aldrei sem nú: "Jafnt var skemmt í elsta hluta garðsins og þeim nýjasta." Elías segir ekki hægt að bæta fyrir skemmdirnar þar sem persónulegir munir hafi verið skemmdir. Lögreglunni í Keflavík var tilkynnt um skemmdarverkin rétt fyrir ellefu í gærmorgun. Ekki er vitað hverjir voru að verki og hefur rannsóknarlögreglan í Keflavík málið til rannsóknar. Tiltektir í garðinum stóðu í allan gærdag og halda áfram í dag.