Engin undanþága vegna fatlaðra

Þroskaþjálfar starfandi við Nesskóla í Neskaupstað og Grunnskólann á Reyðarfirði fá ekki heimild til að aðstoða tvö fötluð börn í bæjarfélögunum, þar sem hætta er talin á að þeir gangi inn á verksvið kennara. Beiðni um undanþágu vegna annars barnsins hefur verið hafnað í undanþágunefnd en afgreiðslu hins málsins var frestað á síðasta fundi nefndarinnar, þar sem sitja tveir fulltrúar launanefndar sveitarfélaga og kennara. Samkvæmt upplýsingum frá fræðsluyfirvöldum í Fjarðabyggð var í fyrstu farið fram á að þroskaþjálfarnir, sem ekki eru í verkfalli, ynnu með börnunum á þeirra sérsviði. Verkfallsstjórn kennara vildi frekar að sótt yrði um undanþágu fyrir bæði sérkennara og umsjónarkennara. Það var gert, en nú er staðan þannig að annarri beiðninni hefur verið hafnað og afgreiðslu hinnar slegið á frest.