Sjómenn langþreyttir á þófinu

Sjómenn segjast fara að verða langþreyttir á samningaþófi sínu við LÍÚ, en fertugasti samningafundurinn hófst hjá Ríkissáttasemjara í morgun, en deilendur voru ekki bjartsýnir fyrir hann. Samningar sjómanna, annarra en vélstjóra, hafa verið lausir frá áramótum og var viðræðum vísað til Ríkissáttasemjara strax í febrúar. Leiðtogar Farmanna- og fiskimannasambandsins eru farnir að viðra þá hugmynd að afla verkfallsheimilda hjá félagsmönnum, en eftir því sem fréttastofan kemst næst er Sjómannasambandið ekki byrjað á því. Enn mun bera talsvert í milli um nokkur atriði, en þó ekki meira en svo að ekki hefur beinlínis slitnað upp úr viðræðunum. Samningamen sjómanna segja að það sé vart fyrr en á þeim tímapunkti, ef til kemur, að fyrir alvöru verði farið að afla verkfallsheimilda. Það er að heyra á sjómönnum að þeir séu síður en svo hrifnir af verkfallshugmyndinni, enda hefur verkfallsaðgeðrum þeirra gegn útvegsmönnum okið með lagasetningu undanfarin ár. Það séu því farin að hlaðast upp atriði, sem nauðsynlegt sé að ræða og leysa við samningaborðið á hefðbundinn hátt.