Slapp naumlega undan ofsaakstri

Maður slasaðist þegar hann kastaði sér frá bíl, sem ekið var á ofsahraða eftir Mýrargötu, skammt frá Slippnum í Reykjavík laust fyrir klukkan tíu í gærkvöldi. Maðurinn var á leið yfir götuna þegar bíllinn birtist skyndilega og sló ekkert af þrátt fyrir að maðurinn væri á götunni, og greip maðurinn þá til þess ráðs að kasta sér frá upp á líf og dauða. Við það skall hann í götuna og meiddist bæði á höndum og fótum. Hann var fluttur á Slysadeild til aðhlynningar, en gat ekki gefið nákvæma lýsingu á bílnum svo ekki er enn vitað hver var þarna á ferð, eða hvort hann ætlaði beinlínis að aka á manninn.