Sauðkrækingar þéna mest

Meðallaun íbúa Sauðárkróks eru umtalsvert hærri en laun annarra íbúa Sveitarfélagsins Skagafjarðar, að því er fram kemur í nýrri skýrslu Atvinnuþróunarfélags Norðurlands vestra. Skýrslan er unnin fyrir atvinnu og ferðamálanefnd sveitarfélagsins. Í skýrslunni kemur fram að meðallaun íbúa í nágrenni Sauðárkróks, í Varmahlíð og á Hofsósi eru um 70 til 73 prósent af meðallaunum íbúa á Sauðárkróki. Laun fólks í sveitum umhverfis Hofsós og í Fljótum eru svo mun lægri eða um 55 prósent af meðallaunum Sauðkrækinga. Meðallaun á Sauðárkróki eru sögð vera um 8 prósentum lægri en í Reykjavík, en um leið bent á að fjárhagur íbúanna þurfi þó ekki að vera verri, enda neyslumynstur fólks ólíkt og húsnæðisverð um 40 prósentum lægra en í höfuðborginni. "Þetta þýðir að fjölskylda í 150 fermetra húsi á Sauðárkróki, greiðir að meðaltali um 180 þúsund krónum minna í vexti á ári en fjölskylda í sambærilegu húsnæði í Reykjavík," segir í skýrslunni.