Bílbeltanotkun ábótavant

Bílbeltanotkun í hópbifreiðum og bílaleigubílum er verulega ábótavant að mati framkvæmdastjóra rannsóknarnefndar umferðarslysa. Hann segir nauðsynlegt að fara af stað með sérstaka herferð þar sem brýnt er fyrir fólki að nota bílbelti í hópbiffreiðum. Aðeins þrír þeirra 48 sem voru í rútunni sem valt nálægt Hvalfjarðargöngunum í gær notuðust við bílbelti. Það þarf kannski ekki að koma á óvart að þessir þrír aðilar sluppu minnst meiddir úr veltunni. Aðfaranótt mánudags lést Pólverji, sem ekki var í bílbelti, þegar bíll valt skammt frá Varmahlíð í Skagafirði. Aðeins rúm vika er síðan Íslendingur og Brasilíumaður létust þegar jeppabifreið valt í Þjórsárdal. Þeir voru ekki í bílbeltum. Ágúst Mogesen, framkvæmdastjóri rannsóknarnefndar bílslysa segir bílbeltanotkun í hópbifreiðum og bílaleigubílum verulega ábótavant. Hann segir erlenda ferðamenn mjög lina við að nota bílbelti hér á landi og sömuleiðis séu Íslendingar lítið fyrir að nota bílbelti í rútum og hópferðabifreiðum. Það sé alls ekki nógu gott, því að ef slíkar bifreiðir velti geti fólk fallið allt að tvo metra og lent ofan á öðrum farþegum sem í bifreiðinni séu.