Lægstu símgjöldin hér á landi

Íslendingar borga minnst norrænu þjóðanna fyrir að tala í síma. Þetta kemur fram í viðamikilli skýrslu norrænu samkeppnisstofnananna sem kynnt var í dag. Höfundar skýrslunnar telja of mikla fákeppni á símamarkaði á Norðurlöndum og æskilegt að stefna að einum norrænum símamarkaði. Skýrsla norrænu samkeppnisstofnananna er viðamikil, 152 síður, og fer um víðan völl í skoðun sinni á norrænum símamarkaði. Ef við lítum á það sem hjartanu er kannski næst, budduna, þá eru bæði jákvæðar og neikvæðar fréttir að finna þar fyrir íslenska símnotendur. Stefán Holm segir Ísland segir koma mjög vel út hvað varðar gjaldskrá fyrir farsímaþjónustu - þar séu við allra lægst. Í talsímanum er við á meðal lægstu þjóða. Neikvæði hluti skýrslunnar hvað varðar samanburðinn liggur í símtölum til útlanda. Slík símtöl eru dýrust hér á landi. Í skýrslunni kemur fram að íslensk símfyrirtæki geta rakið helming hagnaðar síns til farsímagjalda en víðast annars staðar eru farsímagjöld rétt fjórðungur hagnaðar. Stefán segir ástæður þessa liggja í því að hér á landi sé fákeppnismarkaður í farsímaþjónustu. Þá er einnig rétt að geta þess að farsímanotkun er gríðarlega mikil hér á landi og segir Stefán markaðinn nánast vera mettaðan. Engu að síður bendi þetta til þess að þarna sé möguleiki á að lækka verð. Skýrsluhöfundar segja nauðsynlegt að stefna að því að gera Norðurlönd að einum símamarkaði. Ef það takist hafi það mjög jákvæð áhrif á verðþróun á Norðurlöndunum.