Marc Almond í lífshættu

Íslandsvinurinn Marc Almond, söngvari hljómsveitarinnar Soft Cell, er í lífshættu eftir að hann lenti í mótorhjólaslysi í miðborg Lundúna á sunnudag. Almond var fluttur í snatri á sjúkrahús mikið slasaður en að sögn lækna er líðan hans stöðug. Slysið varð þegar bíll keyrði á mótorhjól sem Almond var farþegi á. Almond flaug af hjólinu og hlaut alvarlega áverka á höfði. Hann og ökumaður hjólsins voru fluttir á Royal London sjúkrahúsið í Whitechapel. Í yfirlýsingu sem spítalinn sendi frá sér segir að fjölskylda Almonds hafi farið fram á að söngvarinn fái næði. Soft Cell, sem skipuð var Almond og tónlistarmanninum David Ball, átti einn vinsælasta smell níunda áratugarins, Tainted Love. Sveitin lagði upp laupana árið 1984, þremur árum eftir að hún sló í gegn með laginu, sem seldist í bílförmum beggja vegna Atlantshafsins. Meðal annarra laga sem sveitin sendi frá sér voru Torch, Bedsitter og Say Hello, Wave Goodbye. Almond sendi síðan frá sér annan smell í samfloti með Gene Pitney, lagið Something´s Gotten Hold of My Heart. Almond hefur einnig komið hingað til lands og spilað. Hann fékk Jóhann Jóhannsson, fyrrum liðsmann Lhooq og einn liðsmanna Apparat Organ Quartet, til að semja lög á nýjustu plötu sína en þeir kynntust í gegnum sameiginlegan umboðsmann þeirra.