Olíulinda leitað við Ísland

Búist er við auknum áhuga olíufélaga á að leita að olíulindum í grennd við Ísland og víðar á norðurslóðum vegna hækkandi olíuverðs og ótryggs ástands á mörgum helstu olíuvinnslusvæðunum. Tvö olíuleitarfyrirtæki, sem fengu leyfi til frumathugana á íslenska hluta Jan Mayen hryggjarins, hafa nú lokið athugunum og bjóða olíufélögum niðurstöður sínar til sölu. Þá finnast æ fleiri vísbendingar um að olíu kunni að vera að finna á landgrunninum norður af landinu, að sögn Sveinbjörns Björnssonar hjá Orkustofnun. Olíufélögin eru hins vegar enn vantrúuð á olíulindir þar, þótt jarðgas finnist þar líkt og við olíulindir annars staðar, einkum vegna þess hve jarðskorpan er sprungin fyrir norðan land vegna jarðhræringa. Allt um það þá er nú verið að endurskoða lög og reglugerðir varðandi nýtingu orkulinda í Norðaustur-Atlantshafi og þessa stundin er haldin málstofa í Háskóla Íslands um málið þar sem sérfræðingar frá Noregi, Færeyjum, Írlandi og Grænlandi flytja erindi. Olíuverð er komið yfir fimmtíu og fimm dollara eftir að það hækkaði töluvert í Singapúr í morgun. Sama verð var þegar olíumarkaðir í New York voru opnaðir nokkrum klukkustundum síðar. Olíusérfræðingar eru á því að verðið muni enn hækka og að sextíu dollarar fyrir olíufatið sé alls ekki óraunhæf tala.