Segir herþoturnar óþarfar

Framtíðarhópur Samfylkingarinnar undir forystu Ingibjargar Sólrúnar Gísladóttur varaformanns skilaði af sér áfangaskýrslum á flokksstjórnarfundi á laugardag. Þar kemur meðal annars fram sú skoðun að Íslendingar eigi að taka við rekstri flugvallarins í Keflavík og að það verði dregið úr herbúnaði þar. Þá er bent á að orustuþoturnar þar hafi pólitískt en ekki hernaðarlegt gildi. Davíð Oddsson utanríkisráðherra hefur sagt að verði þær færðar burt jafngildi það uppsögn varnarsamningsins. Ingibjörg Sólrún segir að hópurinn hafi komist að þeirri niðurstöðu að menn vilji fyrst og fremst halda í þoturnar til að halda í pólitíska tengingu en hernaðarlega skipti þoturnar litlu máli. En þýðir þetta að Samfylkingin vilji ekki herþoturnar? "Nei, en við eigum að skilgreina stöðu okkar út frá varnarmálum en ekki pólitískum eða efnahagslegum forsendum. Við eigum að ræða um hlutina á réttum forsendum." En vill Samfylkingin rjúfa pólitísku tenginguna? "Nei, enda viljum við halda í varnarsamninginn," sagði Ingibjörg Sólrún.