Þrýstingi létt af ríkisstjórninni

Vilhjálmur Þ. Vilhjálmsson, formaður Sambands íslenskra sveitarfélaga, skrifaði undir viljayfirlýsingu sambandsins, félagsmálaráðherra og fjármálaráðherra um áhersluatriði í samningaviðræðum ríkis og sveitarfélaga án þess að bera hana undir stjórn sambandsins eða fulltrúa sambandsins í svonefndri tekjustofnanefnd. Fjallar sú nefnd meðal annars um tekjuskiptingu ríkis og sveitarfélaga. Tekjustofnanefndin hafði ekki komið saman síðan í vor vegna ágreinings fulltrúa ríkisins og sveitarfélaganna um það hvort ástæða væri til að endurskoða tekjuskiptinguna. Viljayfirlýsingin átti að höggva á þann hnút. Stjórn Sambands íslenskra sveitarfélaga kom saman 17. september, sama dag og yfirlýsingin var undirrituð. Þar tilkynnti Vilhjálmur að yfirlýsingin hefði verið undirrituð fyrr um morguninn. Samkvæmt heimildum blaðsins lýstu sumir stjórnarmenn yfir óánægju sinni með þetta á fundinum, þar á meðal Árni Þór Sigurðsson, forseti borgarstjórnar, og Kristján Þór Júlíusson, bæjarstjóri á Akureyri. Þeir tveir eru fulltrúar sveitarfélaganna í tekjustofnanefndinni. Þótti sumum í stjórninni að yfirlýsingin hefði létt þrýstingi af ríkisstjórninni án þess að styrkja samningsstöðu sveitarfélaganna. Gunnar Svavarsson, formaður sveitarstjórnarráðs Samfylkingarinnar, segir að yfirlýsingu sem þessa hefði átt að ræða innan stjórnar sambandsins áður en hún var undirrituð. "Það var mikill núningur á milli ríkisins og sveitarfélaganna eins og sést best á því að tekjustofnanefndin hafði ekki komið saman síðan í vor. Þegar komið var fram á haust og menn sáu að það var að skella á verkfall var vitað að tekjuskiptingin kæmi til umræðu. Þá var viljayfirlýsingin undirrituð til að breiða yfir tregðuna í þessum samskiptum. Það má vera að staða manna í stjórnmálaflokkum sé farin að hafa hamlandi áhrif á forystu Sambands íslenskra sveitarfélaga. Vilhjálmur Þ. Vilhjálmsson, formaður Sambands íslenskra sveitarfélaga, segist hafa kynnt stöðu viðræðna sinna við ráðherrana reglulega fyrir stjórn sambandsins. Síðast hafi verið rætt um viðræðurnar á fundi hennar í ágúst. Þá hafi hann haft náið samráð við fulltrúa sambandsins í tekjustofnanefndinni um framgang málsins. "Í yfirlýsingunni er tekjustofnanefndinni falið að skoða fjárhagslega stöðu þeirra sveitarfélaga sem standa höllum fæti og koma með tillögur til úrbóta. Meðal annars hvort rýmka eigi heimildir sveitarfélaga til nýtingu núverandi tekjustofna og hvort til álita komi að marka þeim nýja tekjustofna." Vilhjálmur segir að yfirlýsingin losi ekki þrýsting af ríkisstjórninni. Miklu fremur megi halda því fram að hún setji pressu á að ríkisstjórnin viðurkenni að tekjustofna sveitarfélaganna þurfi að efla. "Ég þurfti að hafa mikið fyrir því að fá ráðherrana til að samþykkja endurskoðun núverandi tekjuskiptingu. Flestir í stjórn sambandsins voru ánægðir með niðurstöðuna en auðvitað hefði verið best að ná öllu okkar fram. Stjórnin fól mér sem formanni að ná samkomulagi og ég gerði það eftir mikla vinnu. Þessi viljayfirlýsing tengist á engan hátt núverandi kjaradeilu sveitarfélaga og kennara heldur eflingu sveitarstjórnarstigsins sem hófst á síðasta ári."