Einokun ekki aflétt

Steinunn Valdís Óskarsdóttir borgarfulltrúi Reykjavíkurlistans segir ekki standa til að aflétta skipulagskvöðum í Grafarvogi sem meina lóðareigendum í Fossaleyni að starfrækja matvöruverslun. Hún segir slíkar kvaðir ríkjandi alls staðar í borginni til að stýra skipulagi svo ekki skapist óreiða. Þeir sem keyptu lóðir undir atvinnuhúsnæði í Fossaleyni, Gylfaflöt og Bæjarflöt þurftu að undirrita yfirlýsingu um að þeir ætluðu ekki að reka þar matvöruverslun. Júlíus Vifill Ingvarsson fyrrverandi borgarfulltrúi er lögmaður og stefnir borginni fyrir hönd lóðareiganda við Fossaleyni Hann segir að uppbyggingu sé löngu lokið í hverfinu og því eigi þessar ráðstafanir ekki við. Þá hafi íbúar aldrei verið spurðir við gerð deiliskipulags hvort þeir vildu gefa viðkomandi kaupmönnum einkaleyfi á verslun í hverfinu. Steinunn Valdís segir málið snúast um að stjórna skipulagi í borginni og það sé í höndum borgarinnar. Það sé ekki heimilt að reka verslun á þessu svæði, þar sem spönginni sé ætlað að vera eins konar miðpunktur. Hún segir málið snúast um skipulag en ekki samkeppni og Spöngin eigi að vera kjarni, sem ekki sé gott að vægi sé dregið úr.