Ávaxtablanda á þrjúþúsundkall

Fjöldi Íslendinga kaupir tæpan líter af djúsi á þrjú þúsund krónur í þeirri von að grennast. Verkefnisstjóri næringarmála hjá lýðheilsustöð segir kúrinn ekki skila meiri árangri en tveir til þrír ávextir, fjölvítamíntafla og nokkur vatnsglös. Eins og gefur að skilja er þyngartap vegna Hollywoodkúrsins fyrst og fremst vökvatap, enda erfitt annað en að léttast þegar einungis eins tólfta af ráðlagðri hitaeiningaþörf meðalmanns er neytt, tvo daga í röð. Íslendingar kunna greinilega vel við sveltið, því að kúrinn rokselst að sögn starfsmanna Hagkaupa. Þegar innihald flöskunnar er skoðað er þó fátt nýtt þar að finna. Hitaeiningarnar koma að níu tíundu hlutum úr venjulegum ávaxtasykri, en að öðru leyti er kúrinn samsettur úr viðbættum vítamínum og steinefnum. Hólmfríður Þorgeirsdóttir, verkefnastjóri næringarmála hjá Lýðheilsustöð segir kúrinn ekki frábrugðinn hverjum öðrum safaföstukúr, nema ef vera skyldi kostnaðinum við hann. Hún segir kílóin koma jafnharðan aftur um leið og sveltinu ljúki og venjulegt matarræði taki við á nýjan leik. Verið sé að blekkja fólk, því að hægt væri að ná sama árangri með því að snæða ávexti, taka inn fjölvítamín og drekka vatn.