Voru komnir óþægilega nálægt

Æfingar rússneska flotans voru óþægilega nærri ströndum landsins, að mati íslenskra stjórnvalda. Því var beðið um upplýsingar frá rússneskum stjórnvöldum. Flotinn hefur lokið æfingum sínum og er farinn. Rússnesk stjórnvöld segjast ekki hafa ætlað að ógna öryggi landsins. Skipin hafa undanfarna daga verið á Þistilfjarðargrunni. Eitt þeirra, beitiskipið Pétur mikli, er kjarnorkuknúið, og hernaðarsérfræðingar hafa fullyrt undanfarið að hætta stafi af því hversu ástand rússneska flotans sé bágborið. Íslensk stjórnvöld óskuðu eftir skýringum rússneska sendiráðsins síðastliðinn mánudag, og síðan við rússneska utanríkisráðuneytið í gær. Illugi Gunnarsson, aðstoðarmaður utanríkisráðherra segir að stjórnvöld hafi ekki áttað sig á því að Rússarnir ætluðu að vera svo nálægt landi og þegar svo langur tími hafi liðið án þess að skipin færu, hafi þótt rétt að óska frekari skýringa. Svar barst í morgun, þar segir að æfingunni hafi lokið í gær, og tekið fram að hún hafi ekki átt að ógna öryggishagsmunum landsins. Illugi segir eðlilegt að gerðar séu athugasemdir við það hve nálægt landinu Rússarnir hafi verið, enda sé um herskip að ræða. Vinstri grænir gagnrýna að íslensk stjórnvöld hafi ekki einfaldlega beðið Rússana eindregið og strax um að fara. Steingrímur J. Sigfússon, formaður Vinstri Grænna segir að vissulega hafi þeir rétt á að fara um alþjóðlega siglingaleið, en málið horfi öðruvísi við þegar skipin liggi við strendur landsins vikum saman. Hann segir það misskilning að flotinn sé utan íslenskrar lögsögu, þó að hann sé utan landhelginnar. Rússarnir hafi verið djúpt inni í íslensku lögsögunni, þar sem við förum með réttindi að ýmsu leyti og eigum meðal annars að tryggja að ekki eigi sér stað mengun þar.Málið verður rætt á Alþingi á mánudag, og verður dómsmálaráðherra til andsvara.