Umber ástandið í bili

Íslensk stjórnvöld voru ekki með puttana í kaupum Landssímans á meirihluta bréfa í Skjá einum, segir Geir H. Haarde fjármálaráðherra. Þorgerður Katrín Gunnarsdóttir menntamálaráðherra segist umbera þetta um tíma þar sem Landssíminn verði seldur. Hún segir þó öllum ljóst að ríkisstjórnin sé ekki fylgjandi mörgum fyrirtækjum í ríkiseigu þegar komi að fjölmiðlum. Þorgerður segir unnið að sölu Landssímans og hún treysti stjórnendum Landsímans til að þetta auki verðmæti fyrirtækisins þegar fram í sækir. Hún það innantómt hjal að Sjálfstæðisflokkurinn sé að misnota aðstöðu sína eins og formaður Samfylkingar og fleiri hafi látið í veðri vaka. Slíkt tal sé helbert kjaftæði, sem sé ekki merkilegt í sínum huga. Hún segir ríkisstjórnina ekki hafa verið með puttana í kaupunum og hún hafi ekki vitað að kaupin stæðu til. Hún segist telja ástandið í lagi um tíma, en ekki til lengri tíma litið. Geir H. Harde fjármálaráðherra segir að stjórnendur Landsímans þurfi ekki að leita leyfis stjórnvalda til að fjárfesta. Hann segist þó ætla að kynna sér málið frekar enda verði það rætt utan dagskrár í þinginu í næstu viku. Hann segir kenningar þær sem Össur Skarphéðinsson hafi sett fram séu fráleitar og lýsi því fyrst og fremst hvernig staðið yrði að málum ef flokkur hans væri við völd. Geir segir ekki verið að ríkisvæða einkafyrirtæki, enda starfi Síminn á frjálsum markaði, þó að ekki sé enn búið að selja hann.