Geðheilbrigðisþjónusta í ólestri

Sveinn Magnússon framkvæmdastjóri Geðhjálpar segir geðheilbrigðisþjónustu í fangelsum á Íslandi óviðunandi. Hann segir að stofnanir sem heyri undir ólík ráðuneyti verði að vinna saman og sníða lausnir sem henti þörfum fólks en ekki varpa því út á götu ef það á ekki heima á viðkomandi stofnunum. Í fréttum Stöðvar 2 í gær var sagt frá kvenfanga sem var vísað frá geðdeild Landspítalans þrátt fyrir tvær alvarlegar sjálfsvígstilraunir. Sveinn Magnússon, formaður Geðhjálpar segir málið alvarlegt og klárt mannréttindabrot. Hann segir það að einstaklingur skuli ekki njóta heilbrigðisþjónustu af því að hann sé fangi, vekja upp spurningu um hvað hefði verið gert ef um annars konar sjúkdóm hefði verið að ræða, svo sem hjartaáfall. Fangelsismálastjóri segir í bréfi til heilbrigðisráðherra þar sem krafist er úrbóta að sex til átta fangar séu svo alvarlega veikir á geði að þeir séu í raun ófærir um að afplána refsingu sína í fangelsi. Fyrir þessa fanga þarf geðdeild með öryggisgæslu sem er ekki til hér á landi. Í undirbúningi er að opna lokaða geðdeild fyrir um tuttugu einstaklinga sem hafa verið ófærir um að liggja inni á venjulegum geðdeildum og mæla nú göturnar. Sveinn segir að það þurfi að klæðskerasníða lausnir eftir þörfum einstaklingana en stefnan hafi meira verið sú að ef einstaklingarnir passa ekki við viðkomandi stofnanir sé þeim varpað út á götu. Hann segir að menn vísi hver á annan og það sýni hve lítið menn tali saman að ein opinber stofnun skuli kæra aðra opinbera stofnun.