Mótmælir einkarétti verslana

Bónus og Hagkaup hafa haft einkarétt á því í átta ár að versla með matvörur í Spönginni í Grafarvogi. Nóg er komið af einokunarverslun segir fyrrverandi borgarfulltrúi sem stefnir borginni fyrir hönd íbúa og fyrirtækis í grenndinni. Tilgangur borgaryfirvalda var að styrkja uppbyggingu matvöruverslunar miðsvæðis í Grafarvogi. Þeir sem keyptu lóðir undir atvinnuhúsnæði í Fossaleyni, Gylfaflöt og Bæjarflöt þurftu að undirrita yfirlýsingu um að þeir ætluðu ekki að reka þar matvöruverslun. Júlíus Vifill Ingvarsson segir að uppbyggingu sé löngu lokið í hverfinu og því eigi þessar ráðstafanir ekki við. Þá hafi íbúar aldrei verið spurðir við gerð deiliskipulags hvort þeir vildu gefa viðkomandi kaupmönnum einkaleyfi á verslun í hverfinu. Júlíus segist hafa gagnrýnt málið í borgarstjórn á sínum tíma. Enda sé það afar ósanngjarnt gagnvart íbúum Grafarvogs að þeim sé meinað að starfrækja matvöruverslun í samkeppni við matvöruverslanir í Spönginni. Þá sé þetta einnig óhollt gagnvart þeim verslunum sem njóti slíkrar verndar. Júlíus Vífill segir að þetta stappi nærri því að vera einokunarverslun enda virðist þessar kvaðir eiga að gilda um aldur og ævi. Hann segir samkeppnisvernd algerlega óþarfa, ekki síst á þessum stað, þar sem fimmtungur borgarbúa búi. Hann segist geta samþykkt slíkar kvaðir mjög tímabundið, en kvaðir af þessu tagi sem eigi að standa að eilífu séu mjög verðmætar, en engu að síður fái Reykjavíkurborg ekkert fyrir þær í þessu tilviki.