Líklega öll farin

Landhelgisgæslan telur allar líkur á að Rússaskipin sem voru austur fyrir landi séu farin. Gæslan er nú í könnunarflugi yfir staðinn. Á miðvikudag bárust þau skilaboð að skipin myndu verða á Þistilfjarðargrunni fram á sunnudag. Ekki er vitað hvort kjarnorkuvopn eru um borð í skipunum, en eitt þeirra, Pétur Mikli, er kjarnorkuknúið og hefur getu til að bera 20 kjarnorkuvopn, en ómögulegt er að segja til um hvort þau séu með í för eður ei. Landhelgisgæslan telur allar líkur á að öll skipin séu farin, en það verður þó ekki staðfest fyrr en könnunarflugi gæslunnar yfir svæðið lýkur sídegis í dag. Ögmundur Jónasson, varaformaður Vinstri Grænna, segir á heimasíðu sinni að íslenskum stjórnvöldum beri skylda til þess að mótmæla veru Rússanna við Íslandsstrendur eins kröftuglega og kostur er, þar sem þau séu raunveruleg ógn við öryggi landsins. Skipin séu tifandi tímasprengja sem geti valdið ómældum mengunarskaða og hugsanlega varanlegum skaða á fiskimiðunum. Á mánudag verða utandagskrárumræður á Alþingi vegna málsins. Steingrímur J, Sigfússon, formaður Vinstri Grænna óskaði eftir umræðunum, en til andsvara verður Björn Bjarnason, dómsmálaráðherra.