Skilur ekki doðann í fólki

Þjóðfélagið hefði farið á annan endann eftir nokkurra daga mjólkurskort segir Andri Snær Magnason, faðir grunnskóladrengs í Reykjavík. Hann skilur ekki hvers vegna fjögurra vikna verkfall grunnskólakennara veldur ekki meira uppnámi en raun ber vitni. Að hans mati hafa grunnskólabörn nú liðið andlegan næringarskort í mánuð. Um 45 þúsund grunnskólanemendur hafa nú verið án kennslu í næstum fjórar vikur, og ljóst er að verkfallinu lýkur ekki fyrir vikulok því sáttafundur hefur ekki verið boðaður fyrr en á mánudag. Verkfall er slæmt fyrir alla, því verður ekki neitað en flestir eru þó sammála um að börnin okkar fari verst út úr þessarri kjaradeilu sem nú er í hörðum hnút. Fréttastofan hefur rætt við marga foreldra og talsmenn foreldrafélaga í dag sem kvarta yfir tómlæti almennings. Svo notuð séu orð viðmælendanna; hér væri allt vitlaust hefði verkfallið leitt af sér bensínskort. Undir þetta tekur Andri Snær Magnason sem segir engan geta firrt sig ábyrgð. Hann segir verkfallið koma öllum við og jfanvel forsetinn eigi að fjalla um málið. Ef verið sé að kenna krökkum að skóli skipti máli og það skipti máli að koma ekki 5 mínútum of seint séu skilaboðin til þeirra afar slæm. Börnin verði sljó af því að hanga heima hjá sér í mánuð. „sjónvarpsstöðvarnar ættu náttúrulega að nota tækifærið og sýna fræðluefni á morgnana, en þær gera það ekki," segir Andri. Hann segir ekkert mikilvægara en nám barnanna og hann skilur ekki hvers vegna það sjái það ekki allir. Hann segir að til að byrja með væri hægt að loka Miklubrautinni á meðan á verkfallinu stæði, enda séu menn ekkert mikilvægara að fara að gera en að hugsa um börnin. Réttast væri að deiluaðilar yrðu látnir útkljá málið matar- og vatnslausir um helgina.