Jafnræðis ekki gætt

Fulltrúi launanefndar sveitarfélaga í undanþágunefnd vegna verkfalls grunnskólakennara, sakar fulltrúa kennara í nefndinni um að gæta ekki jafnræðis við afgreiðslu á undanþágum vegna fatlaðra barna. Digranesskóla var veitt undanþága í dag vegna sérdeildar fyrir einhverfa. Sigurður Óli Kolbeinsson, fulltrúi launanefndar sveitarfélaga í undanþágunefnd vegna verkfalls grunnskólakennara, sendi frá sér yfirlýsingu síðdegis, þar sem hann gagnrýnir harðlega framgöngu Þórörnu Jónasdóttur, fulltrúa kennara í nefndinni. Hann segir Þórörnu hafa synjað fjölda undanþágubeiðna, án þess að kynna sér þær efnislega, og sakar hana um að setja skilyrði, sem ekki séu á valdi nefndarinnar. Sigurður Óli segir enga tilraun hafa verið gerða af hálfu fulltrúa kennara til að gæta jafnræðis við afgreiðslu á undanþágum vegna fatlaðra barna. Þannig hafi öll börn í Öskjuhlíðarskóla notið kennsku og ummönnunar í skólanum frá 4. október, á meðan fulltrúi Kennara hafi ekki fallist á að veita undanþágu vegna barna, sem eins eða verr er ástatt um í öðrum skólum. Sigurður segir þetta ekki boðlegt og telur nauðsynlegt að breyta fyrirkomulagi undanþágunefndar. Anna Kristinsdóttir, borgarfulltrúi Reykjavíkurlistans telur að verið sé að mismuna fötluðum börnum í verkfalli grunnskólakennara. Hún segist telja að Reykjavíkurborg hafi sett markmið um að hafa skólana án aðgreiningar og með því reynt að opna þá og samfélagið allt fyrir þessum einstaklingum. Því hljóti að gilda það sama fyrir einstaklinga í sérskólum og almennum skólum. Landssamtök foreldra, Heimili og skóli, hafa hvatt foreldra til að spyrja kjörna sveitarstjórnarfulltrúa að því hvernig þeir ætli að axla þá ábyrgð að halda úti 170 daga skólastarfi, eins og lög geri ráð fyrir. Elín Thorarensen, framkvæmdastjóri samtakanna segir samtökin hvetja foreldra til þess að skrifa í blöðin, vera sýnilegir og fara fram á að sveitarfélögin semji hvert fyrir sig. Eins séu deiluaðilar hvattir til þess að nálgast hvorn annan, enda sé verkfallið þegar orðið allt of langt.