Nýr flugrisi tekur til starfa

Nýr risi á alþjóðlegum flugmarkaði, Avion Group, tekur til starfa hér á landi um áramótin. Félagið mun eiga 63 breiðþotur. Áætluð heildarvelta er 72 milljarðar króna, sem er tvöfalt meira en velta Flugleiða, og er stefnt að skráningu félagsins í Kauphöll Íslands. Eignarhaldsfélagið Avion Group verður til með sameiningu Atlanta á Íslandi og Íslandsflugs og rekstri Atlanta í Evrópu og Excel Airways. Magnús Þorsteinsson verður stjórnarformaður nýja félagsins og Hafþór Hafsteinsson framkvæmdastjóri. Samanlagður fjöldi starfsmanna verður um 3200 og verða starfsstöðvar rúmlega tuttugu, víðsvegar um heiminn. Atlanta á Íslandi hefur keypt tæplega 31% hlut í Excel Airways, til viðbótar við rúmlega 40% hlut, sem það átti fyrir, og á það því rúmlega 71% hlut í breska flugfélaginu. Yfirtökuskylda hefur myndast og verður öðrum hluthöfum gert tilboð á næstu dögum. Magnús segir að Excel Airways hafi verið skráð í bresku kauphöllinni, en nú hafi það verið tekið yfir og verði afskráð. Stefnt sé að því að fyrirtækið verði skráð í íslensku kauphöllinni Avion Group mun annast rekstur flugfélaga sem starfa á alþjóðlegum vettvangi, og verða sextíu og þrjár Boeing og Airbus breiðþotur í eigu félagsins, en áætluð heildarvelta þess nemur rúmlega sjötíu milljörðum króna. Höfuðstöðvar flugfélagsins verða á Íslandi. Magnús segir slagkraftinn aukast við sameininguna og nú sé fyritækið orðið stærst á sínu sviði og verði því í forystu, sem sé alltaf gott. Magnús segir að áhersla sé lögð á að hagræða og liður í því sé að sameina Atlanta á Íslandi og Íslandsflug, í dótturfélag Avion Group. Ómar Benediktsson verður forstjóri dótturfélagsins, sem verður eitt stærsta og öflugasta félag heims í leigu flugvéla með áhöfn og viðhaldi. Magnús segir frekari fjárfestingarmöguleika til skoðunar, en Iceland Express sé þó ekki einn af þeim í augnablikinu.