Varar við sjálfskipuðum öflum

Arthur Bogason formaður Landssambands smábátaeigenda varar við afskiptum sjálfskipaðra afla, sem berjast gegn fiskveiðum með órökstuddum fullyrðingum. Þetta kom fram i ræðu hans á ársfundi Landssambands íslenskra smábátaeigenda. Vitnaði hann þar til þess að alþjóðlegt bann vð við trollveiðum væri nú komið til umfjöllunar hjá Sameinuðu Þjóðunum. Í því sambandi ítrekaði hann fyrri áskoranir Landssambandsins á stjórnvöld, að efla rannsóknir á umhverfisáhrifum hinna ýmsu veiðarfæra. Þótt allsherjarbann við togveiðum sé komið inn á borð Sameinuðu Þjóðanna, þýðir það ekki að togveiðibann sé yfirvofandi, að minnsta kosti ekki á næstunni. Hinsvegar telja hagsmunahópar í útgerð að ýmsir sjálfskipaðir verndarar hafsins, sem sumir hverjir hafi mikil áhrif á stjórnmálamenn og hafi yfir miklum fjármunum að ráða, kunni að notfæra sér stöðuna. Hingað til hefur andstæðingum trollveiða lítið orðið ágengt nema við strendur Bandaríkjanna, einkum Vesturströndina, þar sem endanlega er búið að banna togveiðar á stórum svæðum. Verksmiðjuskip, sem frystitogarar flokkast undir, eru sérstaklega þyrnir í augum verndarsinna og þótt þeir nái ekki farm banni á heimsvísu, geti þeir hvatt fólk til að kaupa ekki fisk, sem frystitogari hefur veitt. Þetta er raunhæf hugmynd hjá þeim þar sem nákvæmra upprunavottorða er æ víða krafist í fiskviðskitpum.