Meðferð á Torfastöðum í lagi

Meðferð sem veitt var á Meðferðarheimilinu á Torfastöðum var í viðunandi samræmi við samning heimilisins við ríkið, samkvæmt úttekt Ríkisendurskoðunar. Hún telur að meðferðarheimilið gæti átt rétt á uppbótargreiðslu frá ríkinu. Meðferðarheimilið á Torfastöðum hefur um árabil tekið ungt fólk sem á við áfengis- og vímuefnavanda að stríða í meðferð. Þau sögðu upp samningi sínum við ríkið fyrr á þessu ári, að sögn, vegna óvildar forstöðumanns Barnaverndarstofu í garð heimilisins. Félagsmálaráðuneytið fól Ríkisendurskoðun í sumar að gera úttekt á starfsemi heimilisins. Skýrsla Ríkisendurskoðanda er tilbúin og verður hún kynnt síðar í dag. Í henni kemur meðal annars fram að sú meðferðarþjónusta sem heimilinu var ætlað að veita á samningstímanum hafi verið í viðunandi samræmi við samninginn sem í gildi var á milli heimilisins og ríkisins. Torfastaðir hafi þegar á heildina er litið veitt sambærilega eða jafngilda þjónustu og meðferðarheimilin á Geldingalæk og Laugalandi. Í skýrslunni kemur fram að athugasemdir Barnaverndarstofu við eitt og annað í framkvæmd samningsins af hálfu heimilisins, svo sem um skort á kennara, skýrsluskil, áfengisneyslu og fleira, geti ekki breytt þessari meginniðurstöðu. Í skýrslunni kemur ennfremur fram að kostnaður Barnaverndarstofu á árunum 2000 til 2003 vegna samningsins um rekstur meðferðarheimilisins á Torfastöðum var að meðaltali um þremur og hálfri milljón króna lægri á ári en vegna meðferðarheimilisins að Geldingalæk og Laugalandi, og er þá ekki tekið tillit til þess að greiðslum til Torfastaða var ætlað að standa undir skólakostnaði, sem greiðslum til hinna heimilanna var ekki ætlað að gera. Skýrsla Ríkisendurskoðanda kemst að þeirri niðurstöðu að þungvæg sanngirnisrök megi færa fyrir uppbótargreiðslu til heimilisins til að bæta upp það sem skort hafi á til að endurgjald til Torfastaða geti talist sambærilegt við meðferðarheimilin á Geldingalæk og Laugalandi.