Kristján kjörinn formaður

Kristján Gunnarsson var fyrir nokkrum mínútum kjörinn formaður Starfsgreinasambandsins. Fráfarandi formaður sambandsins er svartsýnn við þessi tímamót og óttast að forsendur kjarasamninga séu að bresta. Það er óhætt að segja að það hafi ekki gætt bjartsýni í ræðu fráfarandi formanns Starfsgreinasambandsins, Halldórs Björnssonar, í morgun. Hann sagði samningana frá í vor nánast vera í uppnámi og að ríkisstjórnin hefði annað hvort misskilið kjarasamningana eða að hún kærði sig kollótta um frið á vinnumarkaði. Halldór sagði einkum tvennt hafa áhrif á framvindu samninga. Fyrir það fyrsta gerði ríkisstjórnin ráð fyrir meiri verðbólgu en forsendur samningsins gerðu ráð fyrir. Í öðru lagi hefði sambandið alltaf haft áhyggjur af hinni miklu skattalækkun stjórnarinnar því þær bitni á velferðarkerfinu. Halldór hefur ennfremur áhyggjur af niðurstöðu mála í samningaviðræðum grunnskólakennara við sveitarfélögin. Í ljósi alls þessa þá óttast Halldór að samningunum verði sagt upp í lok næsta árs eða í ársbyrjun 2006. Og nú undir kvöld var Kristján Gunnarsson, formaður Verkalýðs- og sjómannafélags Keflavíkur og nágrennnis, kosinn nýr formaður Starfsgreinasambandsins. Hann segir alltaf einhverjar breytingar fylgja nýju fólki en þær verði ákaflega litlar. Sambandið hafi enda verið afar farsælt undir forystu Halldórs. Á döfinni er meðal annars að stækka einingar sambandsins og standa vörð um kaup og kjör verkafólks, hér eftir sem hingað til. Spurður hvort hann deili áhyggjum Halldórs af kjarasamningum segist Kristján klárlega gera það.