Teymisvinna getur verið tímasóun

Teymisvinna í heilbrigðiskerfinu getur auðveldlega verið tímasóun, ef slíkar aðstæður eru fyrir hendi, segir Lárus Steinþór Guðmundsson, formaður Samtaka heilbrigðisstétta. Teymisvinna á ýmsum sviðum heilbrigðismála hefur farið mjög vaxandi á síðari árum. Lárus segir að vel þurfi að halda á spilum í þeim efnum ef tími eigi ekki að fara til spillis. "Tökum sem dæmi verkjateymi," segir hann. "Sjö heilbrigðisstarfsmenn hittast til þess að fjalla um tíu einstaklinga. Ef einungis hluti þessara heilbrigðisstarfsmanna þekkja sögu og aðstæður þeirra sem á að meðhöndla, þá þarf að eyða tíma í að kynna aðstæður hvers viðfangsefnis. Samkomulag þarf að vera gott og heilbrigðisstarfsmennirnir þurfa að tala sama "tungumálið". Ef bakgrunnur þeirra er misjafn, getur þurft að fara yfir skilgreiningar og samræma túlkun og skilning á þeim. Þá getur verið ágreiningur í teyminu um hvernig eigi að taka eigi á málum og farið umtalsverður tími í að leysa hann." Heilbrigðisstarfsmenn frá ólíkum sviðum innan heilbrigðiskerfisins ætla að tjá skoðanir sínar á þessu viðfangsefni á málþingi í dag klukkan 16.15 í Setrinu á Grand Hótel.