Verkalýðsforingjar á klámbúllum

Vín, villtar meyjar og hjálpartæki ástarlífsins á kostnað stritandi verkalýðs í Svíþjóð hefur velt forystu næststærsta verkalýðsfélags landsins úr sessi. Fyrrverandi gjaldkeri verkalýðsfélagsins Metall í Trollhettan lýsti í útvarpsviðtali heimsóknum verkalýðsforingjanna á klámbúllur og ótæpilegri drykkju þeirra á dýrum börum, þegar þeir ættu leið til Danmerkur og Hollands í nafni verkalýðsfélagsins. Þá hafi þeir keypt hjálpartæki ástarlífsins og gefið þau á báðar hendur. Þiggjendur eru þó ekki tilgreindir. Öllum kostnaði af þessum hliðarsporum hafi svo verið varpað beint á sjóði verkalýðsfélagsins. Talsmaður félagsins, sem telur 400 þúsund meðlimi, segir að níu verkalýðsforingjar liggi undir grun og málið verði rannsakað til hlítar. Þetta hneyksli kemur upp á sérstaklega óheppilegum tíma þar sem verkalýðsfélagið rær nú lífróður fyrir framtíð sex þúsund starfsmanna SAAB- verksmiðjanna eftir að eigandi þeirra, General Motors, tilkynnti að hann ætlaði að flytja framleiðsluna frá Svíþjóð vegna of mikils framleiðslukostnaðar þar í landi og ósveigjanlegra verkalýðsfélaga.