Markalaust hjá FH í Þýskalandi

FH-ingar gerðu markalaust jafntefli við þýska 2. deildarliðið Alemania Aachen en þetta var seinni leikur liðanna í Evrópukeppni félagsliða. Eins og alkunna er töpuðu FH-ingar fyrri leiknum stórt, 1-5, á Laugardalsvelli og því vitað að möguleikar FH-inga á að komast áfram væru afar litlir. Viðureignin fór fram í Köln, á glæsilegum leikvangi, og voru tæplega 22 þúsund manns viðstaddir leikinn sem var sá síðasti á tímabilinu hjá FH-ingum - besta tímabili í þeirra sögu, hingað til. Greinilegt var á öllu fyrir leikinn að FH-ingar ætluðu sér ekki að fá á sig fleiri mörk því þetta sókndjarfa lið stillti upp mjög varnarsinnuðu leikskipulagi. Boðið var upp á 5-3-2 þar sem Guðmundur Sævarsson og Davíð Þór Viðarsson voru í bakvarðarstöðunum. Þeir Tommy Nielsen, Freyr Bjarnason, og Sverrir Garðarsson voru allir í miðvarðarstöðunni. Baldur Bett, Heimir Guðjónsson og Ásgeir Gunnar Ásgeirsson voru síðan á miðjunni en í framlínunni var þeim Allan Borgvardt og Atla Viðari Björnssyni stillt upp. Fréttablaðið náði tali af fyrirliða FH, Heimi Guðjónssyni í gærkvöldi. "Dagsskipunin var að halda hreinu og þess vegna breyttum við nú leikskipulaginu hjá okkur og fórum í 5-3-2 og það verður að segjast eins og er að það tók okkur talsverðan tíma að átta okkur á því - það er varla að við munum hvernig á að spila stífan varnarleik. Þeir á hinn bóginn spiluðu svipað og í fyrri leiknum - pressuðu okkur um allan völl," sagði Heimir Guðjónsson, nýkominn úr sturtunni. "Þeir voru mun meira með boltann og áttu einhver þrjú góð færi en við fengum hins vegar tvö mjög góð færi. Atli Viðar (Björnsson) átti skot í stöng og Allan (Borgvardt) komst einn inn fyrir en markvörðurinn varði vel. Í seinni hálfleik prófuðum við aðeins að færa okkur framar og Jón Þorgrímur (Stefánsson) og Emil (Hallfreðsson) komu inná. Auðvitað langaði okkur að ná sigri en þetta var ágætisleikur hjá okkur þegar á heildina er litið, við vörðumst vel og héldum markinu hreinu sem var aðalmarkmiðið og ekkert nema gott um það að segja." Heimir segir leikmenn FH hafa verið afar meðvitaða um möguleikana. "Þessi leikur var náttúrulega bara spilaður upp á stoltið, við gerðum okkur nú ekki miklar vonir um að fara áfram. Við erum hins vegar afar sáttir eftir þetta sumar, brutum ísinn og náðum þeim stóra," sagði Heimir Guðjónsson.